مدخل شقتك

لان الجواب بيبان من عنوانه
يبقي لازم نهتم بمدخل باب الشقه لأنه أول مكان بنشوفه و احنا داخلين البيت و اخر مكان بتشوفه عنينا و احنا خارجين
لازم يبقي مريح للعين و عملي
تابعنا للمزيد عن كل ما يخص جمال بيتك

الشبابيك

شبابيك الالوميتال ولا ال Pvc ؟؟🤔

لما بنييجي نشتري ونقرر الومينتال ولا PVC .... بنحط شوية معايير كدة ونقيس عليها ... وعشان نحط المعايير ديه بنسأل نفسنا احنا محتاجين من الشباك دة إيه ؟؟

بالنسبه للالوميتال لازم تبقث عارفه عنه شويه معلومات مهمه وهيا😊

1-نوع القطاع :
في قطاع محمل وفي عريض  وفي مفصلي وجرار الحجات دي بتفرق في وزن القطاع

-اشهر الشركات الي بتعمل قطاع الوميتال :
السعد ودا مبقاش عليه طلب كتير   😀

قطاع Bs وفي منه حاجتين
قطاع صغير
قطاع كبير (عريض)

قطاع جامبو وفي منه 3 انواع
قطاع تكنال
قطاع ايجي بل
قطاع فالفين

2- الزجاج :
ممكن يكون single او double ودا الي بيعزل الصوت والحراره +جوانات حول الشباك
الزجاج في الحمام بيبقي مصنقر وفي المطبخ محبب
سمك الزجاج (4مم او 6 مم )

3- الاكسسوار

العجله
السكاك
الجوانات
الفرش (ودا مانع للاتربه )
واشهر شركه في الاكسسوار هيا شركه الشريف علي حسن

4- الدهان

بندهن الالوميتال بطريقه الكترواستيتك (دهان فرن )
اشهر شركه دهانات هي (دوليه)

5- السلك
السلك في السوق نوعين
صلب ودا عيبه بيصدي
فايبر
فالحل يا معلم من وجهه نظرى ام تجيب سلك فيبر امريكي
او سلك صلب +دهان مانع للصدا

ركز معايا هنا 😂

الخلوص بين الالوميتال والحائط نعمله فوم
شبابيك الالوميتال حاجه من 3  (مفصلي او جرار او قلاب ودا للمطبخ والحمام )

ازاي ممكن تستلمه 😊

لازم التقاء العلامتين مع بعض في الجنب ميكونش فيه فراغ
استلم التسكيك
التاكد من الماركات الي جات

تيجي بقا لل pvc 😄

بيتعمل من شبابيك زي الالوميتال بالظبط ولكن ملمسه زي البلاستيك  

طب يا تري بقا ايه مزاياه 👌👌

-اخف وزنا من الالومنيوم
-مضاد للبكتيريا
-عازل للحراره والصوت
-يفضل في المناطق الساحليه

ومن هنا هنعمل كدا مقارنه بسيطه في النهايه بين الالوميتال والpvc ✌✌

يا تري مين فيهم عازل اكتر للحراره ... وهنا نقدر نقول ان ال PVC عازل قوي وأقوي من الالومينيوم في عزل الحراره وبالتالي هيوفرلنا في التكييف والتدفئه 🤗

محتاجين انه يعزل عننا الضوضاء الخارجيه والعكس انه ميطلعش أي صوت من جوة لبره
وهنا نقدر نقول ان ال PVC يكتسح الالومنيوم في النقطة ديه كمان ,,,😎

تأثير العوامل الجويه عليهم .. ال PVC ,,, نقدر نقول انه مبيهموش لان مفيش حاجه بتقدر عليه ... ولا رطوبة ولا امطار ولا غيره ... الالومنيوم مقاومته اقل .  وعشان كدا بيفضل في المناطق الساحليه 

الاستدامه : نقدر نقول ان ال PVC بيعيش أكتر لانه بيقاوم الاكسده والرطوبة والحشرات اما الالومنيوم مقاومته أقل بكتير

عزل الكهرباء : ال PVC ميوصلش كهرباء ,, الالومنيوم موصل جيد للكهربا

مقاومة الحريق :
ال PVC والالومنيوم مقاومتهم للحريق عاليه بس ال PVC عنده حاجه اسمها خاصية الاطفاء الذاتي ...

ومن هنا نقدر نقول ان ال PVC بيكتسح الالومنيوم  ولكن للأسف أغلي منه ...
بس الحاجه اللى هتعملها مره واحدة في العمر .. مش مشكله لما تصرف فيها شوية ف الاول .... وخلي بالك انه هتوفرلك كتييير .... فاللي هتدفعه فيها ف الاول هتوفره بعد كدة ...

بس فيه نقطة مهمه .... ان الالومنيوم برضه وقف معانا كتييير السنين اللى فاتت ... ومنقدر نقلل من أهميته في بيوتنا ..... نسيت أقولكم ان الالومنيوم أقوي من ال PVC 💪

, وتركيب الاتنين لازم يكون من شركة معروفه ومحترمه لان تركيبهم بيفرق ,,, ;)

ملحوظة :

*الزجاج  في الاتنين يفضل يكون دبل مش سينجل عشان تستفاد بمزاياه اكتر

"الالوان في الالومنيوم أكتر بكتير من ال PVC ;)

بورسلين ولا ببتركيه

"بورسلين ولا باركيه" الحيرة التي يواجهها  الكثير من الاشخاص أثناء تجهيز شقة الزوجية أو أثناء تجديد الشقة أو الانتقال لواحدة جديدة.☺

ورغم أن الخيار يرجع بشكل أساسى للأذواق المختلفة، إلا أن مميزات وعيوب الاثنين غالبًا ما تكون هى الحد الفاصل الذى يساعدك على الاختيار، ويساعدك على معرفة أى الخيارين أنسب لشقتك.

البورسلين أم الباركيه👌👌

إن كلا من الباركيه والبورسلين خيارين مميزين، ويمكن أحيانًا المزج بينهما فى الشقة، فنختار الباركيه لبعض الغرف والبورسلين لغرف أخرى.

ويوضح: فى غرفة المعيشة على سبيل المثال لا يفضل أبدًا الباركيه، لأن الغرفة يكون بها الكثير من الحركة ويتم استخدامها لوقت طويل وننقل فيها الكثير من الكراسى ونغير من ترتيب الأثاث أكثر من مرة بالتالى الخشب يتعرض للتجريح ويفقد الباركيه لمعته.

سبب آخر يجعلنا نختار البورسلين لغرفة المعيشة هو أن الخشب يتعرض للتلف إذا وقعت عليه السوائل إن لم نسرع بمسحها بالتالى فى حالة وجود أطفال والكثير من الحركة والمشروبات فى غرفة المعيشة يكون البورسلين الخيار الأفضل.

وبالنسبة لغرفة الصالون فإن الباركيه يمنح انطباعًا بالفخامة والرقى ولأن الاستهلاك لغرفة الصالون يكون خفيفًا فالخشب لن يكون مشكلة، ولكن البورسلين أيضًا خيار ملائم خاصة إذا كانت الغرفة لها طابع "مودرن".

مزايا وعيوب الباركيه

مزايا الباركيه:

- الباركيه خامة طبيعية تمنح راحة نفسية وتجعلنا نشعر بالدفء فى البيت لأن الخشب بطبيعته يمنح البيت الدفء.

- نظرًا لأن الباركيه خامة طبيعية فإنه مثل الرخام شكله طبيعى جميل جدًا وتفريعاته شكلها جميل ومن صنع الطبيعة.

- فى الباركيه هناك أشكال وأطوال كثيرة ويمنحنا خيارات كثيرة بالنسبة للشكل، كما أن هناك طريقتين لتركيبه بين اللصق والمسمار (علفة وفلصة).

تحضيرات تركيب باركيه مسمار علفة وفلصة

- يعيش الباركيه لعمر طويل جدًا قد يصل إلى 20 أو 40 سنة حسب الاستعمال والصيانة ولو حافظنا عليه يمكن أن يعيش لوقت أطول.

- الباركيه كخامة أقيم، له شكل راقى وفاخر.

- عيوب الباركيه

- يأتى الثمن المرتفع للباركيه كخامة وتكلفة تركيبه العالية على رأس عيوب الباركيه، ولكن ميزته بعمره الطويل لا تعتبر التكلفة كبيرة.

- من عيوب الباركيه أيضًا أنه يلائم أكثر الطابع الكلاسيكى للديكور، ويمكن استخدامه فى المودرن ولكن بنسبة قليلة مقارنة بالكلاسيك.

- لو تعرض  الباركيه للماء يتلف خاصة إذا لم تتم معالجته أو "تقفيله" بشكل جيد.

- فى التنظيف والمسح الباركيه متعب جدًا ومزعج حيث لا يجب تنظيفه إلا بمنتجات خاصة.

- يمكن أن يصاب بسوسة الخشب بالتالى يجب أن تتم معالجته بشكل جيد.

مميزات البورسلين
الناس فى الوقت الحالى يفضلون البورسلين لأسباب عديدة على رأسها انخفاض تكلفته مقارنة بالباركيه، رغم أن عمره ليس طويلا كالباركيه

- يمنحنا خيارات أوسع فى ما يخص استايل الديكور.

- تتوافر منه أشكال كثيرة متنوعة بين المنقوش والسادة والشبيه بالرخام.

- هناك أنواع كثيرة للبورسلين فمنه الإسبانى والهندى والصينى والمصرى، والأفضل الإسبانى ويتميز بأن عمره أطول لكن سعره غالى جدًا، أما الصينى فهو خيار غير جيد وعمره قصير.

- البورسلين عملى لكنه لا يمنحنا الدفء مثل الخشب.

- لو تم غسله أو وقع عليه الماء لا يفسد بالماء على عكس الخشب.

- سهل التنظيف بالتالى البورسلين مثالى للمرأة المصرية التى تحب التنظيف والمسح.

انت و السيراميك

لو اول مرة تشتري سيراميك .. لازم تكون عارف كويس جداااا ان:
1- اسم الشركة او الماركة حاجة في منتهى الأهمية، و أفضل طريقة تختار بيها الماركة المناسبة ليك انك تسأل حد جربها قبل كده من حيث الخامة و التعامل.
2- نقي مقاس البلاطة مناسب لمساحة السطح اللي عندك .. الاوض الضيقة هاتلها بلاطة صغيرة 40*40 مثلا .. الاوض الواسعة ممكن 60*60 .. نفس الكلام على المطبخ و الحمام
*بلاط الأرضيات غالبا مربع و الحيطان مستطيل.
3-اتاكد انك رافع مقاس الشقة كويس و دايما احسب بزيادة .. و لو مش متخصص هات مهندس او صنايعي سيراميك يجي يقيس و يقولك تجيب كام متر من اني نوع خصوصا لو في بلاطات الوان و وزرات و حاجات كده .. شكلها هيبقى بايخ اوي بصراحة لو وقفت معاك على متر ولا حاجة.
4-اشتري السيراميك كله مرة واحدة و من مكان واحد .. بلاش تشتري على مرتين او تركب قطعتين سيراميك جنب بعض من ماركتين مختلفتين .. الا لو حلية بسيطة يعني مفيش مشكلة.
5-ماتكلفش سيراميك و تستخرص في صنايعي السيراميك اللي ممكن يضيعلك كل السيراميك اللي جبته.. معلش تعالي على نفسك و كمل الحاجة الحلوة للآخر.
*(نصيحة اختار الصنايعي اللي حابب الشغلانة و بيفنن فيها.. هيكون مبسوط و هو بيشتغل و يطلع احسن ما عنده)
6-نفس الكلام للي هينقلك السيراميك او يطلعه و ينزله على السلم .. ملحوظة (السيراميك بيتحط واقف على حرفه).
7-الذوق ده حاجة بتاعتك و تعبر عنك .. بلاش تسمع او تسمعي كلام حد .. اتفرجي بس على صور كتير على النت مناسبة لذوقك و الوانك و انزلي لفي على معارض كتير قبل ما تشتري.
8-نقي السيراميك اللي مناسب للاستخدام .. لو في طرقة او اوضة فيها حركة كتير و عندك اطفال مثلا يفضل السيراميك المط (المطفي) عشان محدش يتزحلق.
9-قدر الكاش اللي معاك و حاول تظهر اجمل ما عندك قد فلوسك .. مش لازم تعمل الشقة كلها بورسلين او رخام .. ممكن الصالون و الريبشن بس و اوض النوم سيراميك عادي و ممكن يبقى اشيك كمان ;)
10-مش كل الغالي تمنه فيه .. في غالي مش محتاجه .. لو عايز تكلف تشطيبك مفيش مشكلة بس حط الحاجة المناسبة في المكان المناسب.
11-اللون.. اختار اللون اللي يناسبك تماما .. بس خلي بالك ان بعض الالوان بتتأثر بالشمس خصوصا الاحمر.
12-اول لما تستلم السيراميك راجع كويس اذا كان فيه عيوب صناعة ولا لأ .. فرز أول مفروض مايطلعش فيه غلطة واحدة .. بعض الماركات فرز تاني فيها حاجة محترمة برضه (بس مش كله).
13-اللون الحقيقي للسيراميك هو اللي انت شايفه بالنهار و مش هو اللون اللي موجود على العلبة .. ده تقفيل فوتشوب.
14-دايما قاعدة ..
الحاجات الاساسية اللي بتتغير مرة في العمر دي .. نقيها براحتك و اديها حقها اوي.. عشان مشاكلها رخمة و حاول برضه انك تختار اذواق محايدة يعني لو حبيت تغير عفش ولا حاجة الأرضيات تكون ماشية معاها.

المحاره ثم المحاره

لو سمحتم . علشان مصلحتكم ..
اي حد بيشتري شقه جديده . نصف تشطيب . ياريت يشترط انه ياخدها من غير محاره و يستلمها علي الطوب الأحمر .. حتي لو مش هتخصم فارق فلوس و الشقه هتقع عليك بنفس السعر . فانت الكسبان في الآخر .
البند ده من الشغل أرخص بند . بس هو في الحقيقه أهم بند ..
لما المحاره بتكون مش مضبوطه مستحيل اي بند تاني يطلع مضبوط و ده هيبان معاك بشكل سيء جدا لو بتستخدم اضاءات بيوت نور و اضاءات اسبوت .
و كمان هيبان معاك لما تركب الارضيه و تيجي في الطرقات و تلاقي ان الحوائط مش مضبوطه مع خطوط و عراميس الارضيه .
و هيبان معاك في السقف الصناعي لما تلاقي بيت النور من ناحيه 20 سم و من الناحيه التانيه اقل او اكتر ..
البند ده المقاولين و اصحاب المشاريع بيسترخصوا فيه جامد و ماعدش بيتعمل بأي نوع من الضمير .
و أصحاب الشقق لما بيستلموها بالشكل ده بيكونوا امام خيارين أحلاهما . مر .
- يقرر انه كفايه بقي عك و ان لازم يمشي صح .
و في الحاله دي هيصرف فلوس علي تكسير المحاره القديمه و تنزيل و نقل المخلفات . و تشوين رمل و أسمنت و عمل المحاره من اول و جديد .
- يقرر انه كفايه بقي مصاريف . و انه مش هيصرف علي حاجه دفع تمنها قبل كده .
و يبتدي يصرف في كل بنود التشطيبات و في الآخر النتيجه تبقي سيئه و لا يصلح معها أي علاج ...
طيب اللي خلاص اشتري الشقه بالمحاره و مش هيقدر يكسرها كلها .. يعمل ايه يا باشمهندس !!! خلاص هيفضل عايش مع المطبات اللي في الحوائط طول عمره !!! مافيش حل وسط ؟

الهندسه شريان الحياة

ناس كتير لما بيجيلها دور برد🤕🤒 مابتروحش لدكتور.. بتروح للصيدلي و تطلب أي دوا للبرد.. بعضهم عشان يشتري دماغه و بعضهم عشان يوفر 100 جنية كشف الدكتور💸
بس لما بنتقرص و نتعب جامد 😢 و الأدوية اللي نعرفها مابتجبش نتيجة.. بنضطر غصب عننا نروح لدكتور متخصص في الحاجة اللي بنشتكي منها عشان يكتبلنا العلاج الأمثل💉
و بما إننا شعب #فهلوي بطبعه🕵😌 فنفس الكلام ده بنطبق في أغلب تفاصيل حياتنا..😬
أغلب الناس لما يقرروا يبنوا قطعة أرض أو يشطبوا شقة مش بيجيبوا #مهندس متخصص.. و ده طبعاً عشان يوفروا فلوس أتعاب المهندس🤑💰🤔
للأسف الشديد الناس دي فاهمين الموضوع غلط تماماً.. لأن اللي يلجأ لمهندس متخصص يشرف و يتابع شغل التنفيذ لبيته سواء خرسانات أو تشطيبات هيكون هو الكسبان.. خليني أوضحلك إزاي..😉

نجاح أي شغلانة في الدنيا بيعتمد على تحقيق 3 عوامل أساسية مهمة (#الجودة و #الوقت و #التكلفة)👌 يعني لازم نوصل لأعلى جودة ممكنة باقل تكلفة ممكنة و في اقل وقت ممكن و ده اللي مستحييييل يحصل في حالة عدم وجود مهندس🙏👷 متخصص فاهم و شاطر و عنده ضمير، و الإحتمال الأغلب إن مش هيتحقق أي عامل من الـ3 🙄😕

تعالى نحسبها و نشوف إيه اللي ممكن يحصل لو العميل شطب شقته أو بنى بيته بدون مهندس:😉😇

1- بالنسبة للجودة.. طبعاً العميل ماعندوش خلفية إزاي ممكن يستلم البنود بعد ماتخلص، ممكن يجتهد في ده و لكن مستحيل يعرف يستلم زي استلام المهندس 🎓📏، و طبعاً الصنايعي لو هرش إن العميل مش فاهم هيشتغله أحسن اشتغالات و العميل للأسف مش هيكتشف ده غير بعد مايسكن في البيت و تبدأ تظهر العيوب اللي كلنا بنشوفها زي نشع المية و تسريب من السباكة و شروخ البياض و تقشير الدهانات... إلخ 😢😕، ده غير لا قدر الله لو ظهرت عيوب إنشائية زي ترييحات المباتي مثلاً..😱😵

2- بالنسبة للوقت.. ⌚فيه أسطورة كل المهندسين عارفينها بتقول إن أي صنايعي بيحصله على الأقل 3 حالات وفاة لناس قرايبه في كل شغلانه.. 😂😈 و عد بقى عندك الحجج الوهمية اللي مابتخلصش.. مرة يقولك أصل ابنه تعب و مرة يقولك أبوه دخل الجيش.. 😡 و في الحالة دي مابيعرفش يتعامل معاه غير مهندس تربية موقع بيقوله كلمة السر في التليفون يخليه يحضر فوراً👃 😂 ، فتأكد إن الشغل اللي مافيش مهندس بيتابعه بيخلص في أضعاف الوقت.. ممكن المهندس يشطبلك شقتك في شهر و انت تقعد تشطبها سنة و ماتخلصهاش. 🙄

3- بالنسبة للتكلفة.. للأسف الشديد كتير مقتنعين إنه لو مجابش مهندس فهو كدة ناصح و مدقدق و هيوفر فلوس.. 💰 أحب اقولهم أبسلوتلي إنت لو ماجبتش مهندس تأكد انك هتتروق شامي و مغربي و هتدفع فلوس أكتر لأن المهندس هيقدر يجيب الصنايعية بأسعار أقل من اللي انت هتجيبها و حتى بعد مايحط نسبة الربح بتاعته هيكون السعر أقل.. لأنه عارف أسعار السوق و نفس الكلام بالنسبة للخامات.. المهندس ليه علاقات و معارف و يعرف يجيب كل خامة منين بأرخص سعر.. و يقدر يحسب الكميات اللي محتاجها من كل خامة بدقة فمش هيكون فيه هالك، ده غير إن الشغل هيتعمل صح من أول مرة. 👌

#الخلاصة
عشان تضمن إن كل بند و كل تفصيلة في بيتك اتعملت صح.. هات مهندس💪
عشان ماتقعدش تعمل بنود و تعيدها.. هات مهندس💪
عشان تخلص بيتك في وقت أقل.. هات مهندس💪
عشان تدفع أقل.. هات مهندس💪
عشان تسلسل البنود يتعمل صح.. هات مهندس💪
عشان تضمن إن بيتك اتنفذ بأفضل خامات و أعلى جودة.. هات مهندس💪
عشان تبقى مرتاح في بيتك و مافيش تفاصيل منكدة عليك.. هات مهندس💪

دائما التصميم قبل التنفيذ من أهم الخطوات